Dy persona janë proceduar penalisht pasi dyshohet se kanë ndotur mjedisin duke djegur sasi të konsiderueshme kabllosh, telash elektrikë dhe gomash në afërsi të lumit Mat, në fshatin Pllanë të Lezhës.
Pas një denoncimi për ndotje mjedisore, shërbimet e Komisariatit të Policisë Lezhë kanë shkuar menjëherë në vendngjarje, ku kanë konstatuar personat në flagrancë duke djegur materialet.
Si rezultat i ndërhyrjes, janë identifikuar dhe shoqëruar dy autorët e dyshuar, shtetasit E. M., 27 vjeç dhe R. D., 31 vjeç, të dy banues në Milot.
Gjithashtu, policia ka sekuestruar dy furgonë që dyshohet se janë përdorur për transportimin e materialeve të djegura.
Policia e Lezhës u ka bërë apel qytetarëve që të mos ndezin zjarre apo të djegin mbetje në mjedis, si dhe të denoncojnë çdo rast ndotjeje apo veprimtari të paligjshme që dëmton mjedisin dhe shëndetin publik.