Kryeministri Edi Rama ka shkarkuar nga detyra dy zv/ministret e Turizmit Vilma Bello dhe Almira Xhembulla, ndërsa ka emëruar disa zëvendësministra.
Në vend të tyre janë emëruar Ilva Gjuzi zëvendësministre e Turizmit dhe Mjedisit dhe Sofjan Jaupaj. Jaupaj mbante më herët detyrën, “Drejtor për Çështjet Ekonomike dhe Shërbimet Mbështetëse te Ministria e Turizmit”. Gjuzi është zgjedhur nënkryetare e Asamblesë Socialiste ndërsa është kthyer në Shqipëri rreth një vit më parë si një nga prurjet e reja në PS.
Ndryshime janë bërë edhe në Ministrinë e Ekonomisë, Kulturës dhe Inovacionit, ku është larguar nga posti i zv.ministrit të këtij dikasteri Endrit Yzeiraj, i cili është emëruar si zëvendësministër për Evropën dhe Punët e Jashtme. Për postin e Zëvendësministrit të Ekonomisë, Kulturës dhe Inovacionit është emëruar Blerta Rama. Ndërkohë, në Ministrinë për Evropën dhe Punët e Jashtme është emëruar edhe Silda Çepe (Anagnosti).
Një nga prurjet e reja në PS, Ilva Gjuzi e cila është bërë virale në rrjet, pasi teksa u pyet mbi të metat e kryeministrit Rama nga moderatorja e emisionit Jonida Shehu në Euronews.al, tha se Edi Rama është 10 hapa para të gjithë të tjerëve.