Ministria e Drejtësisë në Angli ka publikuar statistikat për numrin e të burgosurve nga ku rezulton se shqiptarët janë nacionaliteti i parë me më shumë të burgosur krahasuar me nacionalitetet e huaja.
Referuar gazetës “The Times”, numri shqiptarëve në Angli për herë të parë mbërriti në 999 pasuar nga polakët 835, rumunët 806, irlandezët 721 dhe xhamajkanët 440.
Sipas këtyre shifrave tashmë shqiptarët përbëjnë 10% të totalit të të burgosurve të huaj në burgje ndërkohë që në vitin 2013 shqiptarët në burgjet angleze përbënin vetëm 2%.
Shumica e shqiptarëve në burgjet angleze vuajnë dënimet si të përfshirë në trafikun dhe shitjen me shumicë të kokainës.
Vitet e fundit vihet re një shtim i theksuar i të dënuarve si të përfshirë në rritjen e Kanabisit artificialisht nëpër shtëpi.
Për 12 muajt e vitit 2019, Shqipëria ka shënuar një rritje të numrit të ekstradimeve dhe letër porosive që kanë ardhur nga jashtë vendit, kryesisht pas bashkëpunimit me 6 shtete, mes të cilave, Italia dhe Mbretëria e Bashkuar.
Bashkëpunimi në mënyrë të ngushtë në kuadër të ngritjes së Skuadrave të Përbashkëta Hetimore (specifikisht me Italinë), për vepra penale të kryera nga organizata kriminale (janë kryer një sërë veprimesh hetimore nga të dyja palët, si arrestime personash, kontrolle banesash, vendosje pajisjesh GPS nëpër makina, remotizim i përgjimeve, marrje në pyetje), etj.
Të dhënat e tjera statistikore për marrëdhënit juridiksionale me autoritetet e huaja për vitin 2019, janë si vijon: 180 ekstradime nga jashtë; 157 ekstradime për jashtë; 625 letërporosi nga jashtë; 639 letërporosi për jashtë.