Lulzim Basha ka propozuar disa ndryshime ligjore të cilat sipas tij i vijnë në ndihmë SPAK-ut.
Basha propozon që në përfundim të mandatit prokurorët e SPAK-ut të emërohen në Prokurorinë e Përgjithshme, në Prokurorinë e Apelit ose të emërohen drejtues të prokurorive duke ruajtur mbrojtjen dhe përfitimet financiare që gëzojnë aktualisht. “Këta janë prokurorë të cilët janë caktuar nga Kushtetuta për të trajtuar problemin e korrupsionit madhor të pushtetarëve dhe kjo bashkë më misionin e luftës kundër krimit të organizuar i vendos ata nën presion të jashtëzakonshëm. Pra detyra e ekipit të PD është të minimizojë hapësirat për presion,” deklaroi Lulzim Basha gjatë një konference me gazetarët. Zgjidhja e çështjes se ku do të punojnë prokurorët e posaçëm në përfundim të mandatit është një kërkesë e hershme e SPAK-ut e cila deri më tani nuk ka marrë përgjigje nga Kuvendi.Por ndryshimi i ligjit për SPAK-un kërkon 84 vota për tu miratuar, dhe Lulzim Basha ka vetëm 11 vota në Parlament ndaj propozimi i tij ka pak gjasa të shkojë përtej deklaratave politike.