Në kuadër të operacionit policor të koduar “Abu Dhabi”, u arrestua sot në Dubai, me qëllim ekstradimin drejt Shqipërisë, shtetasi Amar (Dritan) Shkëmbi.
39-vjeçari, i cili është pjesë e një grupi të strukturuar kriminal, ishte shpallur në kërkim ndërkombëtar për atentatin që iu bë ish-prokurorit Arjan Ndoji në vitin 2019 pranë mbikalimit të Shkozetit.
Ditën e ngjarjes, prokurori Ndoja ishte në automjet me një person me precedent penal, të njohur si i “forti i Sukthit”, Aleksandër Laho (alias Pëllumb Muharremi), i njohur si ‘Rrumi i Shijakut’, dhe me Andi Malokun, ish-punonjës i policisë në komisariatin e Krujës, shofer i prokurorit, i cili mbeti i vdekur.
Mësohet se Shkëmbi është arrestuar edhe më herët, në 2018, në Holandë, pasi i janë gjetur dhe sekuestruar 60 kg heroine.
Më herët, disa media, duke marrë shkas nga një foto e tij me ish-kryetarin e Partisë Demokratike, nisën ta bënin pjesë të rrethit të Bashës, duke e quajtur “miku i ngushtë i ish-kryedemokratit”. Ndonëse, në reagimet e bëra, ai i ka hedhur poshtë, me pretendimin se ishte thjesht një foto rastësore.