Love Story 2 është gati për të nisur transmetimin në Tv Klan. Reality Show dedikuar dashurisë dhe emocioneve të mëdha, do të fillojë më datë 15 nëntor, në orën 20:10, në ekranin e televizionit Klan.
Kësaj radhe, ndryshe nga viti i kaluar, në fron do të jenë dy pretendentë – një vajzë dhe një djalë. Të dy në kërkim të dashurisë, do të kenë përballë djem e vajza që do të “luftojnë” për të fituar zemrën e pretendentëve.
Një risi tjetër është edhe programi i përditshëm Daily Love Story, që këtë vit i është besuar Eni Shehut, i cili do të jetë çdo ditë përballë vajzave e djemve për t’i njohur ata përtej asaj që shohim në spektakël.
Sa u përket opinionistëve, Jerina Lala dhe Robert Aliaj do të vijojnë të na shoqërojnë të hënave. Ndërsa opinionistët që do të jenë në Daily Love Story nuk janë zbuluar ende.