Ministri izraelit i Mbrojtjes Yoav Gallant, ka bërë me dije se trupa tokësore do të jenë gati për të hyrë në Rripin e Gazës, ndonëse nuk ka treguar se kur mund të nisë pushtimi.
CNN, raporton se në një takim me ushtarët izraelitë në kufi me Gazën, Gallant ka thënë të enjten që forcat duhet “të organizohen, të jenë gati” për urdhrin për t’u nisur.
“Ju e shihni Gazën tani nga një distancë, së shpejti do ta shihni nga brenda. Komanda do të vijë,” ka deklaruar ai.
Kryeministri izraelit Benjamin Netanyahu, gjithashtu në një vizitë të veçantë në një zonë në kufi me Rripin e Gazës, u shprehu mbështetjen e qeverisë dhe gjithë vendit trupave të vendosura atje.
“I gjithë kombi i Izraelit qëndron pas jush dhe ne do t’i japim goditjen e fortë armiqve tanë në mënyrë që të arrijmë fitoren. Për fitore!”, u shpreh ai, sipas CNN.
Nga sulmet e Hamasit në tokën izraelite, më 7 tetor, janë vrarë më shumë se 1.400 njerëz.
Si hakmarrje, Izraeli i ka shpallur luftë Hamasit, i cili ka në kontroll Gazën, dhe është zotuar se do ta shkatërrojë grupin, duke mbledhur dhjetëra mijëra ushtarë afër kufirit me Gazën.