“Jemi në pikën kyçe të situatës alarmante. Kemi rritje të nivelit të Bunës, të liqenit të Shkodrës. Jemi në pikën kyçe duke parë dhe impaktin që ka, mund të themi që jemi në menaxhim”,-tha prefektja e qarkut të Shkodrës, Majlinda Angoni.
Kurse nënkryetari i bashkisë Lezhë, Ermal Paçaj ka theksuar se deri më tani si pasojë e motit të keq nuk ka banesa të përmbytura por vetëm probleme në akse rrugore. “Në fshatra situata është normale, nuk kemi probleme të raportuara përveç akseve të bllokuara. Pra nuk ka përmbytje shtëpish por vetëm me ujë në akse të caktuara. Nuk kemi akse të bllokuara për momentin. Në rrugën e vjetër nga qyteti deri në Milot kemi dy tre vende që po ndërhyhet”, tha ai.
Qarku i Gjirokastrës është përfshirë gjithashtu nga reshje të dendura shiu që prej mëngjesit të sotëm duke sjellë edhe problematikat e para. Gjatë natës, në rrugën Lekël-Përmet dhe Kardhiq-Prongji ka pasur vërshime të përrenjve malorë duke sjellë inerte dhe bllokimin e akseve. Mësohet se rruga është liruar në të zbardhur të mëngjesit.
Shqipëria ka hyrë në ditën e tretë që është pushtuar nga moti i keq. Sipërfaqja e përmbytur në Shkodër ka shkuar në 1000 ha. Rrugët janë thuajse të pakalueshme, ndërkohë që uji është futur dhe në hyrjet e pallateve dhe hyrjet e shkollave duke mos lënë nxënësit të futën. Një pjesë e mirë e fshatrave kanë mbetur pa energji elektrike.