Pas inskenimit të një takimi me një pensioniste, që rezultoi të ishtë një militante e Partisë Demokratike, kreu demokrat Lulzim Basha ka publikuar gjatë ditës së sotme një tjetër video ku takon në rrugët e Tiranës, qytetarë të “rastësishëm”.
Por në videon e publikuar gjatë ditës së sotme, Basha shfaqet i shoqëruar nga një djalë i ri teksa bashkëbisedojnë për “vizionin” e kryedemokratit.
Në fakt, i riu me emrin Brenton Kotorri që qëndron përkrah Bashës është një aktivist i kahershëm i Forumit Rinor të Partisë Demokratike. Kotorri, një nga të rintjë më aktivë në mbështetje të partisë demorkatike, njihet për daljet e tij të shpeshta televizive, apo opinionet e shkruara në mbështetje të së djathtës në përgjithësi.
Kotorri, rezulton të jetë i punësuar si Auditues i Nivelit të Parë në Kontrollin e Lartë të Shtetit, pranë Departamentit të Auditimit dhe Performancës.
Shfaqja në videon me mesazh politik të Bashës, e një aktivisti që rezulton të jetë edhe zyrtar i institucionit më të lartë shtetëror të auditimit, cënon në fakt edhe imazhin e Kontrollit të Lartë të Shtetit, që sipas ligjit është një organ i pavarur, i depolitizuar dhe departizuar. Kujtojmë se në krye të KLSH është një ish deputet i PD.
