Ministri i Jashtëm i Sllovakisë, vend i cili mban presidencën e radhës së OSBE-së, shprehet se në tetor duhet të jepet sinjal i fuqishëm për Shqipërinë dhe Maqedoninë e Veriut, përsa i përket çeljes së negociatave.
Ai ka folur për gazetarët gjatë takimit informal të ministrave të Punëve të Jashtme, Gymnich, që po zhvillohet në Helsinki të Finlandës.
“Do të keni më shumë në tetor në Këshillin e përgjithshëm. Mendoj se do të ishte një sinjal i fuqishëm se sa serioz jemi ne. Unë shpresoj që ne të jemi serioz”, ka thënë Lajcak.
I pyetur nga gazetarët se çfarë kuptonte me sinjal të fuqishëm, një shans për çelje negociatash, Lajçak tha: “Shpresojmë të ketë një ftesë sepse do të kishte pasoja serioze për të ardhmen e procesit të zgjerimit”.
Lajcak shpreson që Shqipëria dhe Maqedonia e Veriut të marrin njëkohësisht dritën jeshile për çeljen e negociatave duke e parë si prove serioziteti të Bashkimit Evropian lidhur me procesin e zgjerimit dhe integrimin e Ballkanit Perëndimor. Por bashkëkombasi i tij, ish eurodeputeti sllovak Eduard Kukan në një intervistë pak ditë më parë u shpreh skeptik për Shqipërinë.
Kukan mendon se nisur nga situata aktuale politike në Shqipëri, çelja e negociatave për vendin tonë do të ishte joreale.
Lexo edhe- Shuhen shanset për çeljen e negociatave në vjeshtë? Kukan: Joreale që Shqipëria të marr një datë
“Ata duhet të zbatojnë një reformë të madhe gjyqësore, opozita ka bojkotuar Parlamentin, e mbi të gjitha shqiptarët nuk po gjejnë kompromise”, thekson ai, duke shtuar se do të ishte joreale për Shqipërinë të merrte një datë në këtë moment.
Ndërsa për ministrin e jashtëm të Lituanisë, Linkevicius, procesi i zgjerimit duhet të drejtohet nga performanca e shteteve që duan ti bashkohen BE-së dhe jo nga kalendari.
“Nuk duhet të ketë një rrugë të shpejtë, por duhet të plotësojnë kërkesat. Sinqerisht ky proces, duke folur për integrimin e Ballkanit Perëndimor do të thosha se është mirë të jenë pjesë e jona. Por procesi duhet të drejtohet nga performanca jo nga kalendari. Ka kushte që duhen plotësuar dhe mund të përmend këtu në linjë me BE, politikën e përbashkët për sigurinë, e cila është e rëndësishme. Vendet që duan ti bashkohen klubit duhet t’i përgjigjen rregullave, vlerave dhe parimeve. Nuk është rasti gjithmonë, por në përgjithësi ne shpresojmë që procesi të shkojë në rrugën e duhur dhe ne do e mbështesim”, ka thënë Linas Antanas Linkevicius, ministri i jashtëm i Lituanisë.