Pasi Shqipëria çeli negociatat për grup-kapitullin e parë me Bashkimin Evropian, zv/ministri i Brendshëm Besfort Lamallari bën me dije se sot është zhvilluar një takim koordinues me përfaqësues të institucioneve kyçe në luftën dhe trajtimin e sfidave që lidhen me narkotikët. Gjatë takimit është diskutuar për Kapitullin 24, “Drejtësia, Liria dhe Siguria”, i cili përfshin ngritjen dhe funksionimin e Sistemit të Paralajmërimit të Hershëm mbi Substancat e reja Psikoaktive dhe Observatorit Kombëtar të Drogave
”Nuk ka kohë për të humbur! Menjëherë pas kthimit nga Luksemburgu, ku Shqipëria çeli negociatat për grup-kapitujt ”Themelorë” dhe u njoh zyrtarisht dhe me kriteret e ndërmjetme ‘interim benchmarks’ në Kapitullin 24 ‘Drejtësia, Liria dhe Siguria’, përfshin ngritjen dhe funksionimin e Sistemit të Paralajmërimit të Hershëm mbi Substancat e reja Psikoaktive dhe Observatorit Kombëtar të Drogave, me porosi të ministrit të Brendshëm, Ervin Hoxha dhe Ministrisë së Shëndetësisë dhe Mbrojtjes Sociale u zhvillua një takim koordinues me përfaqësues të institucioneve kyçe në luftën dhe trajtimin e sfidave që lidhen me narkotikët”,-tha Lamallari.
Po ashtu informon se së bashku me kolegen Entela Ramosaçaj kanë diskutuar me përfaqësues të Policisë së Shtetit, Institutit të Policisë Shkencore, QSU “Nënë Tereza”, Instituti i Mjekësisë Ligjore etj., për masat e nevojshme për ngritjen dhe funksionimin e këtyre dy mekanizmave kyçe, në mbrojtje të qytetarëve dhe shëndetit publik. Në përmbushje të angazhimit të ndërmarrë nga qeveria, Lamallari shton se do të sigurohet ngritja dhe funksionimi i tyre i plotë dhe i qëndrueshëm brenda afateve të dakordësuara me Komisionin Evropian.