Kryeministri Edi Rama ka marrë pjesë këtë të martë, më 7 prill, në aktivitetin për prezantimin e vendeve të lira të punës në sektorin publik.
Sipas tij, çdo i ri, i sapodiplomuar apo profesionist që kërkon një mundësi të re, tashmë e ka më të lehtë të informohet dhe të aplikojë për t’u punësuar në çdo institucion publik, përmes portalit Kombëtar të Punësimit dhe Aftësive.
“Më vjen mirë që ne hapim një dritare të re për të gjithë ata që kanë dëshirë të kontribuojnë në sektorin publik”, tha Rama.
Sipas kryeministrit, platforma për punësimin në sektorin publik do të sjellë“më shumë transparencë për të rekrutuar më të mirët dhe përfshin të gjithë sistemin”.
Kryeministri Rama theksoi gjatë fjalës së tij se procesi i rekrutimit të të rinjve në administratë ka ndihmuar edhe në procesin e negociatave. Ai pranoi se në fillim kishte patur frikë për perceptimin që administrata shqiptare do krijonte në Bruksel, por sipas tij ai është suprizuar nga prezantimi dinjitoz.
“E kam shprehur shumë herë, dakord do arrijmë t’i hapim negociatat por pastaj si do ia bëjmë?! Do e kemi të vështirë dhe o zot na ruaj se çfarë perceptimi do japim tek ata në Bruksel për administratën që kemi dhe ka ndodhur për suprizën e shumëkujt, edhe timen, krejt e kundërta. Qindra punonjës e kanë përfaqësuar shtetin shqiptar me shumë dinjitet dhe kanë fituar besimin e palës tjetër, që është stërvitur me dekada për t’ja nxirë jetën atyre vendeve që janë ulur në atë tryezë për t’u anëtarësuar në BE.
Kur ajo palë arrin të shprehë ato vlerësime atëhere vërtet ne kemi arsye të jemi shumë besimplotë që kemi mundësi të ndërtojmë në Shqipëri një administratë dinjitozë dhe të standardeve europiane.”, tha Rama duke shtuar se është pikërisht falë kësaj administrate gjithçka është arritur deri më tani.
Gjatë këtij aktiviteti, ministrja e Shtetit për Administratën Publike dhe Antikorrupsionin Adea Pirdeni tha se synimi i krijimit të këtij mekanizmi është “të sigurojmë kapacitet njerëzore për të përballuar sfidat kryesore”, mes të cilave ajo theksoi procesin e integrimit në BE.
Pirdeni tha se iniciativa që po prezantohet sot vjen në vazhdën për të forcuar administratën. Sipas saj, ka 20-21 kandidatë për çdo pozicion pune në administratë dhe një moshë mesatare 40 vjeç, më e reja në rajon.
Po ashtu, Pirdeni tha se platforma e re “krijon shumë më tepër mundësi të planifikojmë strategjikisht të gjitha burimet tona njerëzore”, ndërsa bëri me dije se së shpejti do nisë një tur për punësimin edhe nëpër universitete. Ajo tha: “Do vijmë ne te studentët!”