Sot, Prokuroria e Posaçme Anti-Korrupsion i kërkoi Kuvendit autorizimin për të arrestuar deputetin Alqi Bllako, i konsideruar si i përfshirë në aferën e inceneratorit të Fierit.
Pritet që Këshillit i Legjislacionit dhe Mandateve të shqyrtojë këtë kërkesë të SPAK gjatë mbledhjes që do të zhvillojë nesër.
Ndërkohë, nuk dihet ende se cili do të jetë qëndrimi zyrtar që do të mbajë PS-ja për dhënien ose jo të autorizimit për lejimin e arrestimit. Megjithatë, nëse kjo ndodh, edhe përbërja në Parlament e maxhorancës do të pësojë ndryshime në emra, por jo në numra.
Kujtojmë se, Alqi Bllako u zgjodh deputet në 25 Prill nga lista e qarkut të Tiranës. Ai ishte renditur i 17-ti në listë, ndërkohë që PS-ja fitoi 18 deputetë në këtë qark. Pra, nëse jepet autorizimi për arrestimin, Bllako do ta humbasë mandatin dhe vendin e tij do ta zërë ish-kryeministri socialist, Pandeli Majko. Në pikën 2 të nenit 164 të Kodit Zgjedhor thuhet se “Mandati i ndërprerë i deputetit ose i anëtarit të këshillit të bashkisë i kalon kandidatit vijues të listës së të njëjtës parti politike në zonën zgjedhore përkatëse, përveçse kur plotësimi i vakancës me kandidatin e radhës ul përfaqësimin e gjinisë së nënpërfaqësuar”.
Majko ishte i 19-ti në listë pa mundur ta marrë mandatin.