Nga Alfred Peza
Megjithëse Shqipëria po bëhet një atraksion turistik gjithnjë e më i lakmuar, ka shumë europianë që ende nuk na njohin. E për më keq, ka nga radhët e politikës së BE ku duam të anëtarësohemi, që na njohin si shtet që qeveriset me ligjet islamike.
“Sheriati duhet të largohet nga Evropa”; nën këtë titull, revista e përjavshme “Elsevier”, citon Pieter Omtzigt, deputet holandez, anëtar i asamblesë parlamentare të KE, sipas të cilit, Shqipëria, Azerbajxhani e Turqia duhet të distancojnë veten nga Deklarata e Kajros. Deklarata është jo detyruese, për të Drejtat e Njeriut në Islam, të nënshkruar nga Shqipëria në vitin 1990.
Johan te Velte, nga Fondacioni i Miqësisë Hollandë-Shqipëri që ka jetuar 5 vjet në Tiranë thotë se “Ligji shqiptar nuk i referohet sheriatit apo parimeve të tij, por praktikave më të mira të demokracive perëndimore. Kushtetuta thotë se nuk ka një besim fetar zyrtar dhe të gjitha format e diskrimiminit, përfshirë atë fetar, janë të ndaluara”.
E kush më mirë se një holandez “shqiptar” do ia kthente këtë përgjigje një holandezi “europian”, që të habit me padijen e tij të plotë, për këtë vend!