Një mbledhje maratonë e PD-së zyrtare u mbyll me debate të forta, sulme dhe kërcënime ndaj deputetëve demokratë. Gazment Bardhi, Jorida Tabaku dhe deputetë të tjerë kërkonin kohë për organizimi në zgjedhjeve për kryetarin e PD-së, por shumica e të pranishmëve, jo deputetë vendosën që zgjedhjet të bëhen menjëherë dhe të jetë 29 korriku dita kur PD të procedojë me zgjedhjen e kryetarit.
Jashtë selisë së PD-së zyrtare ishin mbledhur një numër i pacaktuar personash që nuk kishin lidhje me kryesinë e PD, por mbështetës të Lulzim Bashës. Nga ky grup janë hedhur ofendime ndaj deputetëve Bardhi dhe Korreshi. Të njëjtin fat kanë pasur dhe deputetë të tjerë, si Helidon Bushati, Bledjon Nallbati apo Lefter Gështenja, të cilët kanë dalë më pas dhe janë kërcënuar. Këta persona që u larguan nga mbledhja u panë si persona jashtë linjës së asaj që u vendos në mbledhje dhe që nuk votuan për zgjedhjen e kryetarit të ri.
Jashtë ambienteve të kryesisë, mbështetësit e Bashës iu kanë kërkuar llogari deputetëve “rebelë”, duke iu thënë “t’ju vijë turp”, “po na torturoni”, apo kërcënime të tipit “nëse shkoni te Berisha do ta keni pisk punën”. Sot nuk është lajmëruar asnjë mbledhje e PD-ja zyrtare. Tani mbetet për tu parë se cili do të jetë qëndrimi që do mbajnë një pjesë e mirë e deputetëve që kanë qenë edhe kundër, të kësaj linje të zgjedhjeve të menjëhershme.