Drejtoresha e AKSHI-t, Linda Karcanaj ka bërë me dije se 98% e shërbimeve online janë funksionale pas sulmit kibernetik që zgjati për 14 ditë. Karcanaj shtoi se është kthyer në funksion edhe e-albania, por po punohet ende për njehsimin e diplomave dhe lëshimin e certifikatave, listës së notave dhe vërtetimin e diplomës, kryerjen e pagesës së ujit dhe energjisë elektrike.
“Jam sot këtu për t’ju thënë se pas 14 ditësh pune, ekipi i AKSHIT më në fund u bë e mundur që administrate publike t’i rikthehet normalitetit. Kishte dy lloje sulmi, ransomware dhe 0 clear. Aktiviteti i parë nisi në formën e sulmit ransomware për inkriptimin e të dhënave për të bërë më pas dekriptimin kundrejt pagesës. Por ishte tjetër sulm për të fshirë të dhënat. Falë reagimit të shpejtë nuk pati humbje të dhënash pavarësisht se ishte një shkalle të lartë, u krye izolimi i menjëhershëm duke zbatuar protokollet deri në vlerësimin dhe analizën e plotë të situatës. Sistemet u verifikuan 1 nga 1.
Falë bashkëpunimit me partnerët dhe punës së madhe nga stafi i AKSHI-t kemi këtë status, faqet zyrtare të ministrive dhe sistemi i fiskalizimit u kthyen në punë brenda 12 orësh. Mbi 98% e shërbimeve online janë funksionale. E-albania është kthyer për 1202 shërbime. Të vetmet që po punohet ende është njehsimi i diplomave dhe lëshimi i certifikatave, lista e notave dhe vërtetimi i i diplomës, kryerja e pagesës së ujit dhe energjisë elektrike”, tha Karcanaj.