Nisma ‘Thurje’ ka depozituar sot në SPAK një kallëzim penal për inceneratorët. Shoqëria civile kërkon që Prokuroria e Posaçme të hetojë koncesionet dhe zyrtarët që janë përfshirë. Kallëzimi është bërë për prishje të garës dhe barazisë në tendera.
Një nga aktivistët që ishte i pranishëm në momentin e dorëzimit të kallëzimit, Pano Soko u shpreh se sot kemi një drejtësi më të shtrenjtë, por ende e paprovuar nëse është më e mirë.
Soko gjithashtu solli në vëmendje për mediet dhe opinionin një rast të ndodhur pak kohë më parë, ku gjatë protestave të banorëve për mos lejimin e ndërtimit të incineratorit, duke bllokuar rrugën pati procedime nga prokuroria, ndërsa për aferën koruptive dhe personat përgjegjës nuk ka asnjë hetim.
“Këtu në krah kam Napolonin.Napoloni është një nga banorët e asaj zone aty, i cili protestoi në momentin që kompania po hidhte idenë e ndërtimit të inceneratorit.
Napoloni jo vetëm që është proceduar nga Prokuroria, por ka kaluar edhe dy shkallë gjykimi- për njeriun që protestoi. Ndërkohë që për të gjithë këta zullumqarët që luajnë me paratë publike nuk ka asnjë hetim nga Prokuroria.”-u shpreh aktivisti Soko.
“Një gjë është e sigurt, nga më parë, ne kemi një drejtësi më të shtrenjtë, por a kemi një drejtësi më të mirë? Këtë duhet ta bëjë SPAK.
Nuk po kërkojmë një drejtësi europiane, por të paktën në nivelin e Zimbabves. Ne mbetemi shpresë plotë, që drejtësia një ditë do të vendoset në këtë vend” tha ai.