Nga Dom Gjergj Meta
Në ditën e sotshme, Kolegji i Kardinalëve i mbledhur në Kongregacion të Përgjithshëm, që i paraprin nisjes së Konklavës ka publikuar një komunikatë me të cilën “…dëshiron t’i drejtojë Popullit të Hyjit ftesën për të jetuar këtë moment kishtar si një ngjarje hiri dhe shoshitjeje shpirtërore, në dëgjim të Vullnetit të Hyjit”.
Prandaj kardinalët, të vetëdijshëm për përgjegjësinë për të cilën janë thirrur, kuptojnë “…nevojën e mbështetjes në lutje nga ana e të gjithë besimtarëve. Ajo (lutja) – vazhdojnë ata është fuqia e vërtetë që në Kishë ndihmon bashkimin e të gjitha gjymtyrëve të të njëjtit Trup të Krishtit.” (krh. 1 Kor 12,12).
Përballë madhështisë së detyrës që i pret së afërmi dhe të urgjencës së kohëve që po jetojmë, “… është mbi të gjitha e nevojshme të bëhemi mjete të përvujta të Urtisë së pafundme të Provanisë së Atit qiellor, në bindjen ndaj veprimit të Shpirtit Shenjtë. Është ai protagonist i jetës së Popullit të Hyjit, Atij duhet t’ia vëmë veshin duke mirëpritur atë çka Ai i thotë Kishës” (krh. Zb 3,6).
Në fund të komunikatës së tyre Kardinalët kërkojnë shoqërimin e Zojës në këtë lutje dhe ndërmjetësimin e saj amnor. Prandaj, të dashur besimtarë ju porosis, sidomos në këto ditë që fillon edhe muaji i Majit, për ne muaji kushtuar Zojës Bekuar, që të mbështesim me lutjen tonë Kardinalët që po përgatiten të zgjedhin Papën e ri.
Duke besuar që do të luteni,, sikurse keni bërë deri tani, ju përshëndes e ju uroj përzemërsisht një muaj të bekuar të Zojës për të gjithë ju.