Miliarderi i njohur, Elon Musk ka deklaruar së fundmi se po mendon seriozisht për të krijuar një platformë të re sociale. CEO i Tesla dhe SpaceX nuk dha ndonjë detaj konkret se si do të dukej apo si do të funksiononte platforma që ai po planifikon të krijojë. Por, ai po synon një gjë të tillë pasi pretendon se Twitter nuk lejon fjalën e lirë.
Në një postim në “Twitter”, Musk shkroi se: “Duke pasur parasysh se Twitter shërben si sheshi publik de facto i qytetit, dështimi për t’iu përmbajtur parimeve të fjalës së lirë minon rrënjësisht demokracinë. Çfarë duhet bërë?”, ishin fjalët e tij, ndërsa më pas shtroi pyetjen nëse nevojitet një platformë e re sociale.
Ndërkohë, në një tjetër postim të publikuar, Musk theksoi se “fjala e lirë është thelbësore për një demokraci funksionale” dhe po ashtu vuri në dyshim nëse “Twitter” “i përmbahet me rigorozitet këtij parimi”.
