Të paktën një person ka humbur jetën dhe dhjetëra të tjerë janë plagosur pas shpërthimit të një vullkani në ishullin Java të Indonezisë. Banorët e fshatrave pranë janë parë duke ikur nga një shtëllungë gjigante e hirit vullkanik, e cila arriti deri në 15,000 metra në qiellin mbi provincën e Javës Lindore.
Vullkani në Malin Semeru shpërtheu në orën 14:30 sipas kohës lokale. Zyrtarët thanë se banorët e plagosur kanë pësuar djegie.
“Është një gjendje shumë urgjente që prej shpërthimit të vullkani”, tha zyrtari lokal, Thoriqul Haq.
Indah Masad, zyrtare në qarkun Lumajang tha se numri i të lënduarve është të paktën 41 persona dhe tha se ata kanë pësuar djegie. Por, Agjencia për Katastrofa në Indonezi tha se 35 persona po trajtohen në spitalet lokale. Rrugët dhe urat janë dëmtuar dhe tymi i madh që ka pushtuar zonën, po pengon punën e ekipeve të shpëtimit dhe evakuimit.