Policia e Tiranës ka vënë në pranga tre persona për dhunë në familje, njëri prej të cilëve ishte shpallur në kërkim për këtë akuzë pasi ishte dënuar me 1 vit burg.
RASti i parë është ai i një 32- vjeçari i cili ka kanosur të atin duke i kërkuar para.
“Nga specialistët për hetimin e krimit në Komisariatin e Policisë Nr. 2 u ndalua për veprën penale “Dhuna në familje”, shtetasi R. Ç., 32 vjeç, banues në Tiranë, pasi në banesën e tij ka kanosur me jetë babain e tij, si dhe i ka kërkuar para duke ushtruar dhunë psikologjike”, thuhet në njoftimin e policisë.
Ndërkohë një 31-vjeçar është vënë në pranga pasi ka dhunuar kunatën e tij.
“Nga specialistët për hetimin e krimit në Komisariatin e Policisë Nr. 3 u arrestua në flagrancë, për veprën penale “Dhuna në familje”, shtetasi G. M., 31 vjeç, banues në Tiranë, pasi ka ushtruar dhunë fizike ndaj kunatës së tij”, vijon njoftimi.
Ndërsa I.SH, 54 vjeç ishte dënuar me një vit burg për akuzën e dhunës në familje.
“Nga specialistët për hetimin e krimit në Komisariatin e Policisë Nr. 5 u kap dhe u ndalua shtetasi në kërkim I. Sh., 54 vjeç, banues në Tiranë, pasi Gjykata e Rrethit Gjyqësor Tiranë e ka dënuar me 1 vit burg, për veprën penale “Dhuna në familje”, thotë policia.