Salman Rushdie, novelisti i lindur në Indi kaloi pjesën më të madhe të jetës së tij duke u fshehur pasi myslimanët iranianë e kërcënuan me vdekje pas shkrimeve të tij. Ai u qëllua me thikë në qafë dhe kraharor, para se të ngjitej në skenë për të mbajtur një leksion të hapur në Nju Jork më 12 gusht.
Dëshmitarët në vendin e ngjarjes, rrëfejnë momentin që tronditi jo vetëm të pranishmit në sallë por edhe opinionin publik ndërkombëtar.
“Z.Rushdie po ecte ngadalë dhe u ul afër skenës. Ne po prisnim që ai të mbante leksionin e mëngjesit. Një njeri u hodh para tij në skenë. Nuk e di si ndodhi por në fillim u duk sikur po e godiste në kraharor, e përsëriti goditjen fort në kraharor dhe në qafë. Pashë që kishte një thikë në dorë dhe gjithçka u bë shumë kaotike”.
Disa myslimanë thonë se librat e tij janë të mbushur me pasazhe blasfemie, të cilat ata nuk mund dhe nuk duhet t’i tolerojnë. Librat e tij u ndaluan të shiten e të lexohen në disa vende me shumicë muslimale, që prej vitit 1988, kur u publikua novela e parë. Në kohën kur libri u publikua, Rushdie jetonte në Britaninë e Madhe, atje ku vetë myslimanët britanikë dogjën qindra kopje të librit.