Ministri i Mbrojtjes, Niko Peleshi këtë të martë është në Komisionin e Sigurisë, në një seancë dëgjimore me deputetët. Ministri është përballur me akuzat e deputetëve të opozitës të cilët e akuzojnë qeverinë Rama për mbajtjen e një qëndrimi “prej struci” ndaj deklaratave të bëra nga presidenti serb Aleksander Vuçiç në kuadër të tensioneve në veri të Kosovës.
Qëndrimin e mbajtur nga kryeministri Edi Rama për çështjet e sigurisë në Kosovë, deputeti demokrat Flamur Noka e ka cilësuar tradhti kombëtare.
“Qeveria e Shqipërisë ka luajtur rolin e strucit. Kryeministri ka bërë atë që ishte jashtë çdo perceptimi politik dhe njerëzor. Dashuri patetike për Vuçiç dhe qëndrimin e Rusisë është tradhëti kombëtare. Ai deklaroi se do të dërgonte 1000 trupa në territor shqiptar dhe kryeministri fut kokën si struci. Nuk bën asnjë deklaratë për kundër Vuçiçit dhe kemi parë qëndrime kundër ministrave të Kosovës”,-tha ndër të tjera deputeti demokrat.
Nga ana tjetër ministri Niko Peleshi theksoi që Shqipëria është e para që reagon për çështje të Kosovës, por shtoi ai, “tonet janë gjithnjë në përputhje me ato të NATO-s.”
“Nuk është e drejtë të spekulohet që Shqipëria nuk ka qenë aty kur Kosova ka pasur nevojë për mbështetjeje. Çdo përpjekje dhe veprim i yni është i koordinuar me NATO-n,” theksoi ministri.