Një prind i zemëruar me inicialet R.H nga Kosova shkaktoi terror në Qendrën e Mjekësisë Familjare në fshatin Zhegër të Komunës së Gjilanit. Ai mbante në dorë një sëpatë dhe tentoi që të sulmonte bluzat e bardha, të cilat nuk i kishin ofruar shërbim vajzës së tij 2 vjeçare. Mjekët u justifikuan se ata vepruan në të tillë mënyrë për shkak të grevës në institucionet shëndetësore në gjithë vendin.
Sulmuesi nuk e goditi mjekun kujdestar, por ai shkatërroi një tavolinë në një zyrë. Ngjarja shkaktoi tronditje te stafi mjekësor, që lajmëroi policinë dhe që menjëherë shoqëroi në komisariat autorin. Shaban Azizi, zëdhënës i Policisë së Kosovës për rajonin e Gjilanit sqaroi për gazetën “Zëri” :
“Gjatë ditës së djeshme në mbrëmje nga ora 19:00 një qytetar e ka dërguar një fëmijë në ambulancë dhe duke qenë se mjekët kanë pasur grevë, ata i kanë thënë që jemi në grevë dhe ai është nervozuar dhe ka tentuar ta sulmojë mjekun me sëpatë, por nuk i ka shkaktuar asnjë lëndim. Ka tentuar ta sulmojë vetëm mjekun kujdestar, sepse ai nuk i ka ofruar ndihmën atij dhe ai është revoltuar dhe i ka mëshuar tavolinës. Policia ka reaguar menjëherë, e ka arrestuar atë. Ai është ndalur për 48 orë”, ka thënë ai.
Drejtori i Shëndetësisë dhe Mirëqenies Sociale në Komunën e Gjilanit, Selami Xhemajli tha se edhe pse mjekët janë në grevë, ata duhet të ofrojnë shërbimet emergjente.
“Edhe gjatë ditës së djeshme ne i kemi vizituar mjekët, me rastin e grevës që në raste emergjente të ofrojnë shërbime dhe të kenë kujdes me sjelljen ndaj pacientëve. Mendoj që sindikata e mjekëve duhet të jetë më vigjilente për të mbrojtur stafin dhe për të arritur qëllimet e tyre”.