Deri më tani Kosova nuk ka regjistruar asnjë rast të prekur me koronavirus, po qeveria ka vendosur të marrë masa për të parandaluar ndonjë shpërthim të mundshëm të virusit. Në mbledhjen e sotme qeveria vendosi pezullimin e mësimit në të gjitha institucionet shkollore deri në datën 27 mars.
Përveç kësaj u vendos që të ndalen përkohësisht linjat ajrore dhe tokësore, të gjithë udhëtarët të kontrollohen në hyrje-daljet e Kosovës, dhe nuk do të ketë aktivitete publike për të shmangur grumbullimin e shumë njerëzve në një vend. Ndërkohë, çdo person që kthehet nga vendet e prekura nga koronavirusi do të duhet të vetkarantinohet.
Gjithashtu qeveria e Kosovës vendosi që çdo aktivitet sportiv të zhvillohet pa praninë e tifozëve deri në datën 27 mars.
Kryeministri i Kosovës Albin Kurti kërkoi që këto masa të miratoheshin nga anëtarët e qeverisë dhe propozimet e tij u miratuan me të gjitha votat pro dhe asnjë abstenim.
Masat e plota:
-Ndërmarrja e procesit edukativo arsimor dhe institucioneve arsimore publike dhe private në të gjitha nivelet deri më 27 mars 2020.
-Pezullohet përkohësisht linja e udhëtimit ajëror dhe tokësor.
-Kontroll i obliguar i udhëtarëve nga ekipet mjekësore të QKMF’vë në të gjitha hyrjet dhe daljet e Kosovës me mbështetjte të PK;së.
-Vetëkarantim i detyruar për të gjithë qytetarët që hyjnë në KOsovë nga zonat epidemike me rrezik të lartë dhe të mesëm.
-Aktivititetet publike dhe jo publike mund të zhvillohen të mbyllura pa praninë e publikut.
-Të ndalohet veprimtaria e restoranteve, klubeve të natës, palestrave, pishinave pas orës 23:00.
-Të ndalohet eksporti i pajisjeve, materialeve dhe medikamenteve mjekësore nga ana e operatorëve ekonomik dhe prodhuesve, përveç me Vendim të Qeverisë.
-Të gjitha institucionet qeveritare, si dhe ndërmarrjet publike dhe private detyrohen të ndërmarrin masa për mbrojtje dhe dezinfektim në të gjitha institucionet sipas udhëzimeve nga Ministria e Shëndetësisë, të cilat kanë të bëjnë me masat e përforcuara higjienike.
-Të gjitha ndërmarrjet publike dhe kompanitë privatë që kryejnë transport publik të udhëtarëve, obligohen të bëjnë dezinfektim të rregullt të mjeteve transportuese.
-Të ndalohet transporti i organizuar ndërkombëtar (autobus, minibus dhe të ngjashme) drejt vendeve me rrezik të lartë dhe anasjelltas.