Ministri i Mbrojtje, Niko Peleshi nuk i ka kursyer kritikat për kryebashkiakët, për të cilët tha se presin që zjarri të marrë përmasa të mëdha dhe më pas telefonojnë për helikopterin.
I shoqëruar edhe nga Drejtori i Agjencisë së Mbrojtjes Civile, Haki Çako, Peleshi ka nisur nga Korça një tur takimesh me strukturat e Emergjencave Civile, me qëllim sensibilizimin e njësive vendore për identifikimin e hershëm dhe eliminimin e vatrave potenciale të zjarreve veçanërisht gjatë sezonit veror.
“Ju kërkoj së pari qytetarisht mirëkuptim dhe bashkëpunim, së dyti ligjërisht. Nuk mund të vazhdojë më kështu që bie një zjarr diku, bashkia bën sikur nuk e shikon, pret sa zjarri të marrë një përmasë të qenësishme dhe pastaj i bie telefonit të marrë helikopterin. Kështu ka ndodhur deri tani. Ne do bëjmë tonën, edhe për rritjen e gatishmërisë së helikopterëve, kemi lajme shumë të mira edhe nga komisioneri i emergjencave civile, të cilit i dhamë aplikimin zyrtar për t’u bërë anëtarë të Mekanizmit Evropian. Kemi marrë sigurinë që do të na përgjigjen, sepse ndonjëherë nuk mjaftojnë as 2 helikopterë, as 5 as flota ndonjëherë kur vatrat e zjarrit janë të shpërndara në të gjithë Shqipërinë siç ishin vitin e kaluar dhe siç parashikojmë të jenë edhe këtë vit.”
Po ashtu, ministri porositi prefektët që të ngrenë strukturat e emergjencave civile në mënyrë që bashkitë të përfitojnë fondet e buxhetit të dedikuara nga qeveria.