Dy muaj përpara se të ndërronte jetë, kryefamiljari nga Tirana me inicialet H.K, kërkoi një noter për t’ia lënë banesën gruas dhe një personi që gjatë dy viteve të fundit u kujdes për të dhe bashkëshorten e tij.
Gjashtë ditë pasi i moshuari ndërroi jetë, sipas dosjes që Top Channel disponon, i biri i vetëm i çiftit, kur kërkoi çeljen e trashëgimisë së firmosur në datë 21 tetor 2009, datë kur e ëma dhe i ati kishin firmosur tek noteri lënien e shtëpisë atij, u përball me një befasi, pasi i ati kishte firmosur një tjetër testament, ku e përjashtonte nga e drejta e pronësisë.
I riu insistoi se dokumentet ishin falsifikuar me ndihmën e noterit. Mirëpo prokuroria ka përdorur si prova bindëse ndaj djalit denoncues jo vetëm akt ekspertizat që vërtetojnë se firma e të atit nuk ishte e falsifikuar, por gjithashtu edhe dëshminë e nënës e cila ka këmbëngulur se i biri i braktisi gjatë kohës që ata ishin të sëmurë.
Gjithashtu, një raport i shtatorit të vitit 2021 i firmosur nga dy mjekët, Brikena Allkoja dhe Valbona Hysenbelli tregoi për prokuroren që hetoi çështjen se babai i denoncuesit kishte qenë në gjendje të ndërgjegjshme ditën që kërkoi noterin për të firmosur testamentin përfundimtar duke anuluar të parin.