OFL bën të ditur se janë sekuestruar disa automjete të blinduara në kushtet e emergjencës që i përkasin tre personave që janë në listën e anti- KÇK.
Bëhet fjalë për automjete që i sekuestrohen Saimir Taullaut, Dashamir Gjokës dhe Durim Bamit, nga Kruja.
Ka qenë drejtori i Policisë së Shtetit Ardi Veliu ai që ka nxjerrë urdhrat e sekuestrimit në kushtet e emergjencës.
NJOFTIMI I OFL
Në vijim të Operacionit Forca e Ligjit, në zbatim të ligjit special për masat pasurore ndaj individëve të dënuar apo akuzuar për krim të organizuar, Drejtori i Përgjithshëm i Policisë së Shtetit, në bazë të nenit 19 të Aktit Normativ nr. 1, datë 31.01.2020, nxorri urdhrat e sekuestrimit në kushtet e emergjencës për disa automjete të blinduara, të cilat u sekuestruan gjatë operacionit.
Automjetet e sekuestruara janë në pronësi të shtetasve:
S. T., banues në Lushnjë, i dënuar për veprën penale “Prodhimi dhe shitja e narkotikëve”;
D. Gj., banues në Durrës, i dënuar në Itali për trafik të qenieve njerëzore;
D. B., banues në Krujë, i dënuar për veprën penale “Vjedhja me armë”;
Operacioni vijon dhe OFL do të informojë publikun në vijimësi për të gjitha nismat procedurale dhe operacionet ekzekutive që do të kryejë.