Presidentja e Kosovës, Vjosa Osmani, thotë se presidenti i Serbisë, Aleksandër Vuçiç, duhet të ndalojë mbështetjen për “bandat kriminale” nëse vërtet ai kërkon paqe në veriun e Kosovës.
“Sfida vjen nga Serbia, një vend që ende duhet ta pranojë të kaluarën e tij”, tha Osmani për agjencinë e lajmeve Reuters. Ajo po merr pjesë në një takim të Komunitetit Politik Evropian, i cili po mbahet në Kishinau të Moldavisë.
“Situata është e tensionuar, por ne duhet të sigurohemi që e rivendosim sundimin e ligjit në Kosovë, dhe të kuptojmë se kërcënimi vjen nga mohimi që i bën Serbia ekzistencës së Kosovës si shtet sovran”, tha Osmani.
Autoritetet e Kosovës kanë fajësuar “bandat kriminale serbe”, të dirigjuara nga Beogradi, për tensionet në veriun e vendit, të banuar me shumicë serbe.