Një ndërhyrje delikate, jetëshpëtuese, është realizuar me sukses nga ekipi multidisiplinar i kirurgëve, urologëve dhe reanimatorëve në Spitalin Kirurgjikal të Qendrës Spitalore Universitare “Nënë Tereza” në kryeqytet.
Pas një seri ekzaminimesh dhe konsultës së përbashkët të disa mjekëve specialistë, u realizua me sukses heqja e tre tumoreve (në veshkë, mbiveshkoren e majtë dhe tëmth), duke ruajtur veshkën e vetme që pacientja kishte.
Ecuria post-operatore ishte shumë e mirë dhe 67-vjeçarja tashmë është larguar në shtëpi në gjendje të mirë shëndetësore, bëjnë me dije mjekët.
Nëpërmjet një postimi në Facebook, edhe kryeministri Edi Rama, ka përgëzuar ekipin me Dr. Arvit Llazani, Dr. Aurel Janko, Dr. Zamira Hysenaj, Dr. Orient Hasanaj dhe infermieret, Eliora Goxhabelliu dhe Mirjana Mema, të cilët realizuan kryerjen e kësaj ndërhyrjeje të vështirë.