Edi Paloka ka komentuar zhvillimet në seancën e sotme parlamentare, qëndrimin e opozitës dhe maxhorancës për hetimin amerikan.
Në një lidhje me News24, kreu i Këshillit Kombëtar të PD-së u shpreh se nga akuza për ish-zyrtarin e lartë të FBI-së Charles McGonigal ka dalë vetëm maja e ajsbergut. Ai tha se Rama është nën hetim dhe akuzohet indirekt për korrupsion dhe se SPAK duhet të nisë hetimet.
“Është skandali më i madh. Kjo qeveri që skandali i zë skandali dhe ai i radhës është dhe më i madh se ai paraardhës bën këtë gjë. Ky është skandal i përmasave ndërkombëtare. Skandal politik, demokratik. Kryeministri i një vendi anëtar të NATO-s ka korruptuar një nga zyrtarët më të lartë, shefin e kundërzbulimit e FBI-së, njeriu që presupozohet të jetë nga më të sigurtët”, tha Paloka.
“Rama citohet me emër, sepse përmendet dhe qeveria e Kosovës, kurse Rama citohet me emër. Gjithë aktakuza përfshin Ramën dhe këta personazhet, por në faqen e fundit kërkohet që të gjitha kontaktet, emailet të vihen në dispozicion të grand jurisë. Kjo ndodh vetëm kur personi është nën hetim. Rama është i implikuar direkt dhe nuk mund të thotë ç’lidhje kam unë. Kemi një institucion këtu, SPAK-un i cili detyrimisht pas këtyre akteve të drejtësisë amerikane duhet të hyjë në veprim. Kryeministri i një vendi indirekt akuzohet për korrupsion sepse aty thuhet se janë përdorur informacionet e zyrtarit të FBI për të goditur opozitën shqiptare. Ky Neza i pagoi na xhepi këto para. Ky Duçka që e shëtiste dhe i paguante drekat e darkat për kë i bënte. Ajo që ka dalë në aktakuzë është maja e ajsbergut. Aty ka përgjime, emaile dhe e gjithë korrespodenca e kryeministrit është e kontrolluar. Ai s’mund të fshehë kokën si struci. Çfarë ka dalë është maja e ajsbergut”, tha Paloka.