Ministri i Shtetit për Diasporën Pandeli Majko është shprehur ditën e sotme se Partia Socialiste ka mësuar nga gabimet dhe i pranon fajet, ndaj meriton një mandat të tretë në zgjedhjet e 25 prillit.
Ai tha se qeveria është përballur me tërmetet dhe pandeminë, ndaj mund të ketë edhe ndonjë faj.
“Nuk mund të krahasohemi me qeverisjen e mëparshme, kemi mësuar nga gabimet. Kemi kaluar periudha shumë të vështira, që përfshijnë tre tërmetet dhe pandeminë dhe ia kemi dalë. Ne po përpiqemi të nxisim reflektimin e njerëzve tanë. Janë njerëzit që na kanë votuar dhe ndihen të pakënaqur, por ne themi që i pranojmë dhe fajet”, tha Majko në “Top Talk”.
Për sa i përket synimit për zgjedhjet e 25 prillit, Majko thotë se PS ëkrkon të marrë votat e personave që e kanë votuar 4 vite më parë.
“Sikur të kemi votat që kemi pasur në zgjedhjet e fundit, jemi mbi 70 mandate”, tha ministri.
Pandeli Majko renditet i 19-i në listën e Tiranës, që do të thotë se mandati i deputetit nuk është i sigurt për të. I pyetur nëse do të largohet nga PS pnëse nuk fiton mandatin, Majko tha se do të vazhdojë të jetë socialist.
“Unë jam rritur në PS. Mbi gjysma e jetës sime fizike është me komunitetit tim socialist, është jashtë çdo dyshimi nëse i shmangem përgjegjësive karshi komunitetit të PS. Nëse nuk do të jem deputet nuk do të thotë se s’jam socialist. Jam te vija e zjarrit sepse dua t’i them cdo socialisti, sidomos atyre që janë të mpirë apo të mërzitur sepse duhet ta shikojnë greminën. Nuk kërkojmë asnjë votë të kundërshtarit, nëse marrim votat e njerëzve tanë si në zgjedhjet e fundit ne nuk e diskutojmë 2017-ën”, tha Majko.