Për Ditën e Flamurit dhe të 111 viteve Pavarësi të shtetit shqiptar, për herë të parë në vendin tonë do të organizohet Parada e shqiptarëve. Me pjesëmarrjen e mijërave shqiptarëve nga të gjitha trojet, parada do të mbledhë mbi 150 Ansamble popullore.
Parada të fillojë në orën 11:00. Parakalimi fillon nga sheshi “Nënë Tereza”, si pika e grumbullimit, për të vijuar në drejtim të sheshit “Skënderbej”. Pasi të bashkohen të gjithë në sheshin “Skendërbej”, aty do të jetë ngritja ceremoniale e flamurit.
Parashikohet që parada të zgjasë disa orë, nga ora 11 deri në orën 14:00 dhe do të parakalojnë disa grupe, më pas vjen ceremonia e ngritjes së flamurit. Presidenti Bajram Begaj, kryeministri Edi Rama, kryetarja e Kuvendit Lindita Nikolla do të bëjnë ngritjen ceremoniale të flamurit në orën 10:00 në Vlorë.
Me flamuj kuqezi dhe këngë patriotike qytetarët e Kosovës dhe Maqedonisë së Veriut janë nisur drejt Vlorës e Tiranës në këtë ditë të shënuar të 28 nëntorit, shpalljes se Pavarësisë. Ata thonë se festa e Pavarësisë eshte një feste e gjithë kombit shqiptar kudo që ndodhet ndërsa kanë përcjellë edhe urimet për 28 nëntorin.
Kryeministri Edi Rama ka zgjedhur foton e një vajze të vogël të veshur me kostum tradicional, e cila prek flamurin kombëtar për të uruar shqiptarët kudo që ndodhen për këtë ditë të shenjtë të historisë së shtetit tonë. Të njëjtën rrugë, përmes rrjeteve sociale ka gjetur dhe ish-kryeministri Sali Berisha, i cili në X ka postuar një fragment të këngës “Rrjedh në këngë e ligjërime” të Vaçe Zelës me urimin “Gëzuar miq, ditën e Flamurit”.
Kreu i Partisë së Lirisë, Ilir Meta shkruan krah fotos së tij teksa bën homazhe në monumentin e vendosur në Vlorë për të shënuar këtë ditë se “Flamuri Kombëtar është simboli që bashkon të gjithë shqiptarët nga Skënderbeu te Adem Jashari”.
Urimeve i është bashkuar dhe Lulzim Basha. “Gëzuar Ditën e Pavarësisë, Shqipëri! Uroj nga zemra të gjithë shqiptarët për festën e flamurit kuq e zi, simbolit tonë të shenjtë të lirisë dhe krenarisë kombëtare”, shkruan Basha në Facebook.
Lexo edhe https://tirananews.al/111-vjetori-i-pavaresise-google-vishet-kuqezi/