Kryetari i Partisë Demokratike, Lulzim Basha ka bërë një reagim pasi SPAK zyrtarizoi akuzat e ngritura ndaj ish-kryeministrit Sali Berisha, dhëndrit të tij, Jamarbër Malltezi dhe ndërtuesit Fatmir Bekatshi.
Ndonëse në postimin e tij nuk e përmend emrin e Berishës në mënyrë direkte, Basha i bën thirrje drejtësisë për ndëshkimin e të korruptuarve dhe rikthimin e parave në xhepat e qytetarëve.
Ky mesazh vjen një ditë pas arrestimit të Jamarbër Malltezit dhe caktimit të masës “detyrim paraqitje” për Berishën.
“Qytetarë të varfër, korrupsion i lartë. Ky është realitetit sot në Shqipëri që po detyron shqiptarët të largohen nga vendi. Prandaj sot është jetike t’i jepet fund pandëshkueshmërisë. Të korruptuarit duhet të japin llogari para drejtësisë e paratë që u kanë marrë shqiptarëve t’u kthehen mbrapsht. Paratë që sot shkojnë në xhepat e pushtetarëve të kthehen në të mira për qytetarët”, shkruan Basha.