Një parazit që gjendet në jashtëqitjet e maceve mund të ndihmojë në trajtimin e kancerit në të ardhmen. Sipas një studimi të një profesori britanik, paraziti që shkakton toksoplazmozën, një infeksion i rrezikshëm për gratë shtatzëna duket se është i dobishëm në shkatërrimin e tumoreve kanceroze, bazuar në gjetjet e para nga eksperimentet e zhvilluar te minjtë.
Për shumë vite, studiuesit janë përpjekur të zbulojnë se si mund ta përdorin sistemin tonë imunitar për të trajtuar kancerin. Kjo sepse përveçse na mbron nga bakteret dhe viruset, sistemi ynë imunitar eliminon qelizat e rrezikshme nga trupi, siç është kanceri. Megjithatë, ndonjëherë këto qeliza dhe tumore zhvillojnë teknika për të shmangur barrierat imune të trupit, dhe kështu arrijnë të mbijetojnë dhe të riprodhohen.
Ndërsa janë zbuluar metodat për të ndryshuar këto teknika për kancerin e mushkërive dhe melanomës, tumoret e tjera si kanceri i gjirit, vezoreve dhe prostatës nuk mund të trajtohen në këtë mënyrë. Këto tumore janë të rrethuara nga qeliza që bllokojnë reagimin e trupit ndaj tyre, që do të thotë se qelizat imune nuk dinë t’i sulmojnë ato. Megjithatë, paraziti që shkakton toksoplazmozën duket se shkakton një reagim të menjëhershëm të trupit, kështu që qelizat imune që prodhohen arrijnë të kontrollojnë apo edhe të vrasin tumorin kanceroz.
Një ekip shkencëtarësh në Universitetin e Nottinghamit në Anglinë qendrore ka krijuar një mutacion të parazitit Toxoplasma gondii. Ai më pas e injektoi këtë lloj te tumoret e melanomës tek minjtë. Më vonë ai e provoi atë në tumoret malinje në zorrë dhe mushkëri.
Futja e parazitit të gjallë direkt në tumorin kanceroz shkaktoi një përgjigje të fortë imune tek minjtë dhe tumoret e tjerë në të cilët paraziti nuk ishte vendosur gjithashtu u zbulua se kishin një përgjigje të shtuar imune në trup. Rezultati është se rritja e tumoreve frenohet ndjeshëm, në shumë raste ato tkurren dhe shkalla e mbijetesës së kafshëve eksperimentale rritet ndjeshëm. Përveç kësaj, u regjistrua një rritje e konsiderueshme në qelizat e imunizimit.
Artikulli i Hani Elseiha, profesor i parazitologjisë në Universitetin e Nottinghamit, thekson se eksperimentet përfshinin vetëm minj dhe se do të duheshin disa vite dhe shumë kërkime për të përcaktuar nëse trajtimi ishte i përshtatshëm për njerëzit.
Megjithatë, ky është një hap shumë i rëndësishëm në luftën kundër formave më të rënda të kancerit.