Parisi është i pari kryeqytet europian pa skutera elektrikë në qarkullim. Prej këtij 1 shtatori hyn në fuqi ligji që ndalon përdorimin e tyre në rrugët e kryeqytetit francez. Ndalimi me ligj pason një referendum të zhvilluar më 2 prill, ku një shumicë dërrmuese prej 89% të qytetarëve pjesëmarrës ishin kundër lejimit të tyre për të qarkulluar nëpër rrugë e trotuare.
Vitin e kaluar, vetëm në Paris janë regjistruar 459 aksidente, ku janë përfshirë skuterët elektrikë, ndër të cilët pati edhe 3 viktima. Në 2021-shin në gjithë Francën u shënua shifra më e lartë e viktimave nga aksidentet me këto mjete, 24 në total. Banorët e Parisit shfaqen megjithatë të ndarë për këtë vendim drastik.
“Ajo ç’ka më duket mua më e rrezikshme është se nëpër to hipin 2- 3 vetë, venë kufje dhe sduan t’ia dinë. Mirë bëjnë që i ndalojnë.“
“Mendoj se duhet t’i kishin lënë. Janë mjete transporti si gjithë të tjerët. Sot na duhet të lëvizim shpejt dhe ato e plotësojnë këtë kërkesë pasi shmangin trafikun.“
Ditët e fundit, bizneset e dhënies së skuterëve elektrikë me qera kanë kthyer tek prodhuesit e tyre në Gjermani nga 400 mjete në ditë. Ato pritet të zëvendësohen me biçikleta elektrike.