Parlamenti në Maqedoni miratoi me 81 vota pro, amendamentet kushtetuese që i hapin rrugë ndryshimit të emrit në Republika e Maqedonisë Veriore, siç u vendos me Greqinë për t’i dhënë fund një mosmarrëveshjeje të gjatë dhjetëvjeçare.
Me këtë votim ka mbaruar zyrtarisht procesi për ndryshimet kushtetuese të vendit fqinj, ndërsa marrëveshja e Prespës do t’i kalojë tashmë Parlamentit grek për t’u ratifikuar edhe atje në mënyrë që gjithçka të konsiderohet e përfunduar.
Edhe pse qeveria e Zoran Zaevit nuk i kishte votat e mjaftueshme për të miratuar ndryshimet kushtetuese, ishin votat e deputetëve ish-anëtarë të VMRO-DPMNE-së në opozitë, ato që bënë të mundur ndryshimin e emrit të Maqedonisë.
Tetëdhjetë e një deputetë në parlamentin me 120 vende votuan në favor. Përfaqësuesit e opozitës VMRO-DPMNE, të cilët kundërshtuan marrëveshjen me Greqinë, bojkotuan votimin. Kreu i VMRO-DPMNE-së Hristjan Mickoski tha se do të bëj gjithçka që të bllokojë procesin e ndryshimit të emrit.