34-vjeçarja që humbi jetën pas abortit, sipas drejtorit të spitalit të Elbasanit, Agron Gaxha ka marrë trajtimin e nevojshëm. “Pacientja ka marrë trajtimin e nevojshëm në spital. Nuk mund të shprehemi për shkaqet e humbjes së jetës pa dalë ekspertiza mjeko-ligjore. Jemi ende në pritje të shkresës”, tha Gaxha.
Prokuroria e Elbasanit ka nisur hetimet penale për dy mjekë të Maternitetit, gjinekologu Arben Paralloj, 56 vjeç, si dhe mjeku anestezist reanimator Behar Gjevori, 60 vjeç, për veprën penale “Neglizhenca në trajtimin mjekësor”.
Sipas të dhënave më të fundit që vijnë nga kjo ngjarje, bëhet me dije se mjekët, gjinekologu dhe anestezisti kanë thënë se gruaja është larguar vetë për në banesë, pasi ata i kanë kërkuar që ajo të qëndrojë, por ende nuk është marrë dëshmi familjarësh të së ndjerës.