PD e Shkodrës reagon pas dorëheqjes së drejtorëve: Rama po vendos PS nën administrimin e Tom Doshit
Partia Demokratike dega Shkodër, ka reaguar pas dorëheqjeve të disa drejtorëve në këtë qark, një ditë pas urdhrit të kryeministrit Rama.
Në një deklaratë për mediat, PD Shkodër thotë se Edi Rama po imponon një proces tërësisht antiligjor dhe se “po vendos Partinë Socialiste nën Shkodër, në administrimin e Tom Doshit”.
“Kryetari i sektit të Rilindjes, orët e fundit po imponon një proces tërësisht antiligjor, diskriminues dhe në gjurmët e etërve të tij biologjikë e politikë. Edi Rama po vendos PS Shkodër, në administrimin e Tom Doshit, personit i shpallur “non grata” nga Shtetet e Bashkuara të Amerikës. Por fillimisht, po i spastron “fushën” duke i lënë në dorë të gjitha drejtoritë rajonale në Shkodër.
Me një urdhër të paprecedent në historinë edhe të vendeve më të prapambetura të Afrikës, Edi Rama ka nisur instalimin e partisë – shtet duke filluar nga Shkodra, ekzaktësisht siç bënë komunistët në 1945“, thuhet në deklaratën për media.
Sipas PD-së urdhri për dorëheqje në bllok të të gjithë drejtorëve rajonalë në Qarkun e Shkodrës, është totalisht antiligjor dhe në shkelje flagrante të Kushtetutës,
Sipas PD, një lëvizje e tillë e Edi Ramës, bëhet edhe për ti hedhur “hi syve” shkodranëve, ndaj i bëri thirrje qytetarëve që të ngrihen për të rrëzuar Edi Ramën.
“Është një përpjekje e dështuar për të tërhequr vëmendjen nga skandali i Shkodrës, ku me 30 qershor kandidoi një të inkriminuar, ashtu siç bëri me Vorën dhe me bashki të tjera që do të evidentohen në ditët në vijim. Nga sot, Shkodra e Shqipëria kanë një arsye më shumë për tu angazhuar në largimin një orë e më parë të Edi Ramës kësaj fatkeqësie kombëtare që nuk ndalet duke krijuar probleme për shkodranët e shqiptarët. Të gjithë bashkë, pa dallime partiake kemi detyrë para të sotmes dhe të ardhmes, të ngrihemi e ta shporrim një sahat e më parë!”, vazhdon më tej deklarata.