Mesfushori i Belgjikës, Kevin de Bruyne, pas ndeshjes në “Allianz Arena” ka deklaruar për BBC, se “Djajtë e Kuq” provuan gjithçka për të fituar kundër Italisë. Ndeshja përfundoi 2-1 për “Azzurrët”, duke e eliminuar Belgjikën nga vazhdimi i “Euro2020”, shkruan “Footballitalia”.
“Unë mendoj se kemi provuar gjithçka për ta fituar atë ndeshje, ata shënuan një gol fantastik, por i pari mund të ketë qenë një gabim nga ana jonë. Gjithsesi, ata kishin më shumë zotërim dhe nuk arritëm të shënonim, gjë që është turp. Eliminimi është gjithmonë një zhgënjim,”- është shprehur de Bruyne pas ndeshjes, duke mos e fshehur dëshpërimin.
Italia në gjysmëfinale të “Euro2020” do të përballet me Spanjën, e cila arriti që ta mposhtë Zvicrën në penallti, pasi që ndeshja përfundoi 1-1 pas 120 minutave në Shën Peterburg.