Pas konfliktit të ndodhur ditën e sotme për pronën pranë shkollës “Petro Nini”, është shkarkuar nga detyra drejtori i Policisë së Tiranës, Kastriot Skënderaj. Vendimin për lirimin nga detyra të këtij të fundit e ka bërë të ditur ministri i Brendshëm, Sandër Lleshaj në një postim në profilin e tij në Facebook.
Vetëm pak orë më parë Lleshaj ‘dënoi’ edhe sjelljen e Policisë së Shtetit ndaj banorëve të cilëve do t’u shembej banesa sipas një vendimi të prerë të gjykatës.
“Vendimi i kreut të Policisë së Shtetit për lirimin nga detyra të drejtuesit të Policisë së Tiranës është reagimi i duhur. Nuk mjafton që Policia të jetë ligjërisht në rregull. Prej saj kërkohet më shumë. Ajo duhet të jetë dhe me mendje e zemër në lartësinë që e kërkon ndjeshmëria dhe interesi i publikut. Jo si sot, tek rruga e shkollës “Petro Nini”!” shkruan Lleshaj.
Skenderaj mbante këtë post që prej datës 16 shkurt 2018. Në vend të tij është komanduar Dhimitraq Ziu.