Ish-nënkryetari i PD, Astrit Patozi, ka komentuar zhvillimet e fundit politike brenda PD.
Ai është shprehur se e kishte parashikuar që PD do të përfundonte në këtë situatë.
Sipas tij, ndarja tashmë është evidente përderisa dy statutet do të përfundojnë në gjykatë.
Patozi thekson se antagonizmi ka arritur në pika groteske, saqë të dyja palët po drejtohen me akuza shumë të rënda ndaj njëri-tjetrit.
Ish-koordinatori i Bindjes Demokratike tha se, Lulzim Basha ndan lekët me Taulant Ballën dhe me krimin e organizuar.
“E kam parashikuar me saktësi si një orë zvicerane. Nuk është lajm i keq që dy statutet kanë përfunduar në gjykatë, se nuk kishte rrugë tjetër. Tek e fundit kjo nuk është një gjë që do zgjasë pafund.
Të dyja palët duhet të pranojnë të vërtetën. Ato janë dy formacione politike të ndryshme. Ndarja është e pashmangshme dhe nuk është fundi i botës.
Antagonizmi i dy palëve ka arritur në pika groteske, saqë sot po të dëgjosh të dy palët në akuzat ndaj njëri-tjetrit kanë shkuar aq larg saqë unë nuk do të çuditesha sikur njëri prej tyre ti thoshte tjetrit se është përgjegjës edhe për vrasjen e Avni Rustemit.
Sepse ne kemi dëgjuar gjithçka. Kemi dëgjuar që Lulzim Basha është përveçse besëprerë, dhe ka qenë i tillë, kemi mësuar se , Lulzim Basha ndan lekët me Taulant Ballën dhe me krimin e organizuar. Kemi mësuar se Lulzim Basha ka shitur detin në marrëveshjen e famshme të rrëzuar nga Gjykata Kushtetuese. ”, tha Patozi.