Kryesia e PD-së së vulës, ka vendosur të thërrasë sot mbledhjen e Këshillit Kombëtar, por 17 deputetë të PD-së kanë paralajmëruar se nuk do të marrin pjesë, për verifikimin e listës së anëtarëve të këshillit dhe të listës së zgjedhësve të cilët do të votojnë për kreun e ri të demokratëve. Zgjedhja e kryetarit të ri të Partisë Demokratike ka përçarë edhe më shumë PD-në e vulës.
Sekretari i Përgjithshëm i PD-së, Gazment Bardhi tha se mbledhja që pritet të mbahet sot nga Këshilli Kombëtar i PD-së është ilegjitime dhe e papranueshme për shkak se anëtarët e kryesisë që e kanë njoftuar, kanë vepruar në kundërshtim me statutin duke shkelur kompetencat e tij si Sekretar i Përgjithshëm i partisë.
Ai tha edhe se veprimet e kryera së fundmi, tregojnë se po veprohet për interesin personal të disa individëve, duke nënkuptuar Lulzim Bashën i cili së fundmi është rikthyer në takime me të rinjtë demokratë duke lënë të kuptohet se planifikon të kandidojë për kreun e partisë.