Këtë të hënë, pedagogët hodhën akuza duke thënë se përshkak të presioneve nga kryeministri Edi Rama, greva e urisë u anulua. Kurse kreu i PD-së, Sali Berisha në një deklaratë shtypi nga selia blu, tha se pedagogët kanë mbështetjen e plotë të PD-së.
“Përshëndes sindikatën e Universiteteve të vendit, për vendosmërinë, mbrojtjen që u bëri e u bën interesave jetike të pedagogëve, punonjësve, studentëve, intereave jetike të kombit shqiptar.
Kjo sindikatë ka vendosur që të ndërpresë thirrjen për bojkot por të vijojë luftën e betejën. E garantoj që në çdo hap të saj ajo dhe cilado organizatë që mbron një kauzë të drejtë do ketë mbështetjen totale të PD. Theksoj se nuk mund të pajtohem kurrë që një pedagog në Tiranë të marrë gjysmën e rrogës që merr një pedagog në Prishtinë.
Qeveria e Kosovës nuk vjedh taksat, fondet e pasuritë publike siç vjedh Edi Rama. Nuk mund të pajtohem që buxheti për shkencën në Kosovë të jetë disa herë më i madh se në Shqipëri, që studentët në Kosovë të subvencionohen me 100 euro kurse në Shqipëri u mbyllen dyert e universiteteve. Ne shprehim mbështetje të plotë ndaj sindikatës së universiteteve të vendit”, tha Berisha.