Bulevardi Zogi i Parë është kthyer mjaft problematik e nëse do të duhet të udhëtosh me makinë në të, e ke të pashmangshme tronditjen për shkak të tullave që lëvizin që janë vendosur shumë vite më parë.
Por kryebashkiaku Erion Veliaj ka dhënë dhe lajmin e mirë, se për pak ditë do të nisë rikonstruksioni i saj dhe rehabilitimi i fasadave. Këtë deklaratë ai e bëri gjatë inagurimit të rikonstruksionit të plotë të shkollës “Jeronim de Rada”, ku puna do të nisë pas 54 vitesh.
Për pak ditë do të fillojmë nga puna. Do të bëhet jo vetëm nëntoka, por edhe të gjitha fasadat, sheshet e vogla, kështu që besoj janë fatlumë ata që jetojnë mes Bulevardit “Zogu I” dhe rrugës “Fortuzi”: do të kenë një bulevard të ri dhe një shkollë të re”, deklaroi Veliaj.
Shumë shpejt komuniteti i Njësisë 9 në kryeqytet do të ketë një shkollë tërësisht të re, me kushte e mjedise dinjitoze për 1100 nxënësit e saj. Pas 54 vitesh, me mbështetjen e Katarit, Bashkia e Tiranës ka nisur punën për rikonstruksionin e plotë të shkollës “Jeronim De Rada”, e cila do të ketë jo vetëm më shumë klasa në dispozicion, por edhe laboratorë e palestër të re.
Kreu i Bashkisë së Tiranës, Erion Veliaj, së bashku me Ambasadorin e Katarit në Shqipëri, Ali bin Hamad Al-Marri, inspektuan nisjen e punimeve për rikonstruksionin e shkollës, çka shmang përfundimisht mësimin me dy turne.