Botërori hyn në fazën vendimtare, ku nuk ka më vend për gabime. Brazili do të përballet sonte në orën 19:00 me Japoninë në ndeshjen e 1/16-ve, përballë një kundërshtari që në vitet e fundit ka treguar një nivel të lartë loje dhe organizimi.
Në konferencën për shtyp para ndeshjes, trajneri i “Seleçaos”, Carlo Ancelotti, u pyet për forcën taktike të Japonisë. Tekniku italian u shpreh se skuadra e tij nuk duhet të bjerë në grackën e analizave të tepërta, por të fokusohet te loja e saj dhe të japë maksimumin në fushë.
Ancelotti konfirmoi gjithashtu se Neymar ka bërë përparim të dukshëm në ditët e fundit, por sqaroi se ai nuk do ta nisë ndeshjen si titullar. Sipas trajnerit, aktivizimi i sulmuesit do të varet nga ecuria e takimit.
Brazili e mbylli fazën e grupeve në vendin e parë të Grupit C, pasi barazoi me Marokun dhe fitoi ndaj Haitit dhe Skocisë. Për shkak të cilësisë së skuadrës, konsiderohet favorit për kualifikimin, por Japonia mbetet një kundërshtar i vështirë, pasi nuk njeh humbje që prej shtatorit. Në 10 ndeshjet e fundit spikat fitorja ndaj Anglisë në “Wembley”, si edhe suksesi në miqësoren kundër Brazilit në Tokio.
Vetëbesimi i japonezëve është rritur ndjeshëm. Sulmuesi 21-vjeçar Kento Shiogai, pjesë e Wolfsburgut, deklaroi para sfidës se “Brazili nuk ka më shkëlqimin e dikurshëm”, duke shtuar se nuk e sheh skuadrën amerikano-jugore si një favorite të padiskutueshme dhe se përbërja e saj nuk e frikëson.
Fituesi i kësaj sfide do të përballet në fazën e 1/8-ve me fituesin e çiftit Bregu i Fildishtë–Norvegji.