Këtë të hënë kanë dalë në një protestë para Bashkisë së Durrësit, personat me aftësi të kufizuara, të cilët po përballen me një situatë të rënduar ekonomiko-sociale veçanërisht gjatë këtij viti, kur kriza ekonomike ka prekur më shumë se këdo këtë kategori sociale që ndihet e diskriminuar dhe pa mbështetje.
Të organizuar në shoqatën ”Shpresë për të verbrit”, ata protestuan para bashkisë së Durrësit për të denoncuar mungesën e mbështetjes financiare nga kjo bashki në këtë kohë të vështirë.
“Protestojmë para bashkisë Durrës për të denoncuar këtë bashki për mospagesën e kompensimit të energjisë elektrike që nga janari 2022. Janë 7 muaj që të verbërit nuk marrin këtë kompensim. Kemi kërkuar vazhdimisht takim, por kryetarja nuk ka denjuar të na presë. Me ligj ky kompensim duhet të jepet çdo muaj. Denoncojmë dhe mosdhënien e shtesës së energjisë elektrike që është për fashën tonë që nga 2015. I jemi drejtuar dhe komisionerit për diskriminimin. Kemi dhe shumë probleme të tjera”.
Nëse nuk do të marrin përgjigje, të verbrit paralajmëruan se do të vazhdojnë protestat për të drejtat e tyre dhe përfitimin e kompensimit dhe shtesave të mohuara deri më tani.