Juventusi ditën e sotme në 20:45 nis edicionin e ri të Serie A ndaj skuadrës së Sampdorias në “Allianz Stadium”. Pirlo debuton për herë të parë në një ndeshje zyrtare. Përtej gëzimit të debutimit, ish-mesfushorin nuk e pret një punë e lehtë. Problemi më i madh për momentin është mungesa e një qendërsulmuesi.
Higuain u largua pak ditë më parë dhe në Torino presin Edin Xhekon, për të cilin është në tratativa me Romën. Megjithatë, ndaj Sampdorias duhet të bëjnë pa një qendërsulmues tipik me emër në Europë. Në mungesë të këtij lojtari, Pirlo ka vendosur që ditën e sotme të grumbullojë Xhakomo Vrionin.
Sulmuesi i talentuar i kombëtares sonë ka shansin e artë për të fituar sadopak minuta e të tregojë veten e tij. Mbetet të shihet nëse do të ketë mundësi të debutojë 21-vjeçari, teksa Pirlo pritet ta nisë me Ronaldon si qendërsulmues nga minuta e parë. Gjithsesi, mund të themi se grumbullimi i Vrionit është shenjë se Pirlo i ka dalluar cilësitë e sulmuesit të kuqezinjve.