Një person ka mbetur i plagosur pasditen e kësaj të marte në zonën e “Lagunës së Patokut” në Kurbin.
56-vjeçari me iniciale B. S., banues në Milot, dyshohet se pas një konflikti të çastit për motive të dobëta, ka plagosur me çifte, B. P. 49 vjeç, banues në Krujë. Ky i fundit është transportuar në spital për ndihmë mjekësore dhe ndodhet jashtë rrezikut për jetën.
Grupi hetimor në vendngjarje vazhdon veprimet hetimore për zbardhjen e plotë të rrethanave të ngjarjes.
Ndërkohë, janë ngritur pika kontrolli dhe po bëhet krehja e zonës me qëllim lokalizimin dhe kapjen e autorit.