Policia e Shkodrës ka dhënë detaje të reja lidhur me ngjarjen e ndodhur mbrëmjen e të mërkurës në pedonalen e qytetit, ku mbeti e plagosur një 35-vjeçare.
Në pranga janë vënë tre persona ndërsa është shpallur një tjetër në kërkim. Personat e arrestuar kishin ardhur nga Durrësi dhe Shkupi në Shkodër ku kanë pasur konflikte të vazhdueshme me Marsid Metën, pronari i mjetit BMV që u gjet i braktisur, i cili është shpallur në kërkim.
Mësohet se Meta i është kundërpërgjigjur të shtënave të tyre me armë zjarri, ku mbeti e plagosur 35-vjeçarja.
Dyshohet se ngjarja mes Ardian Rexhës, 31 vjeç, Ension Burakut, 29 vjeç nga Durrësi, dhe Riad Xheladini 22 vjeç nga Shkupi, dhe Mersadit ka ardhur si pasojë e prishjes së pazareve të drogës.
Ndërkohë mësohet se në një ngjarje të tillë Mersad Meta është përfshirë dhe në Gjermani.
NJOFTIMI I PLOTE
Shkodër
Zbardhet dhe dokumentohet brenda pak orësh ngjarja e ndodhur mbrëmjen e datës 05.02.2020, ku u plagos me armë zjarri shtetasja L. J.
Finalizohet operacioni “Reagimi”.
Operacioni nga DVP Shkodër, në bashkëpunim me DVP Tiranë dhe DVP Durrës.
Kontrolle të shumta, në disa qytete, për kapjen e autorëve.
Arrestohen ne flagrancë 3 shtetas dhe shpallet në kërkim 1 tjetër.
Menjëherë pas ngjarjes së ndodhur në orët e mbrëmjes së datës 5 shkurt, në pedonalen e qytetit, ku si pasojë e shkëmbimit të zjarrit mes dy personave mbeti e plagosur një kalimtare, Drejtoria Vendore e Policisë Shkodër, nën drejtimin e Prokurorisë ngriti një grup të posaçëm hetimi, me qëllim zbardhjen e ngjarjes, identifikimin dhe kapjen e autorëve.
Falë veprimeve të shpejta dhe profesionale të kryera nga grupi hetimor, si dhe në bazë të informacioneve të marra në rrugë operative u bë i mundur identifikimi i autorëve të dyshuar të kësaj ngjarjeje.
Mbi bazën e këtyre informacioneve dhe provave të grumbulluara, nga strukturat e DVP Shkodër, në bashkëpunim DVP Tiranë dhe DVP Durrës, u finalizua operacioni policor “Reagimi, në kuadër të të cilit u bë e mundur kapja dhe arrestimi i në flagrancë i shtetasve:
A. R., 31 vjeç, banues në Durrës, E. B., 28 vjeç, banues në Durrës dhe R. Xh., 22 vjeç, banues në Shkup, Maqedoni.
Gjithashtu është shpallur në kërkim M. M., 26 vjeç, banues në fshatin Berdicë, Shkodër.
Nga hetimet e kryera në kohë rekord nga grupi hetimor i DVP Shkodër rezultoi se shtetasit A. R., E. B. dhe R. Xh. kanë qëlluar me armë zjarri mbrëmjen e datës 05.02.2020, rreth orës 22:40, në lagjen “Vasil Shanto”, në drejtim të shtetasit M. M., i cili iu është kundërpërgjigjur me armë zjarri dhe si pasojë ka mbetur e plagosur shtetasja L. J. (kalimtare).
Po nga hetimet dyshohet se këta shtetas kishin konflikte të hershme me njëri -tjetrin.
Në vendngjarje është gjetur dhe sekuestruar një automjet që i përket shtetasit M. M.
Materialet iu referuan Prokurorisë së Rrethit Gjyqësor Shkodër, për veprat penale “Vrasja në rrethana të tjera cilësuese”, “Plagosja e lehtë me dashje” dhe “Armëmbajtja pa leje”.